TEBIGAT

Halas eder seni dertden, gussadan,
Dogan boluň eziz tebigat bilen.
Nura öwrülersiň assa-assadan,
Dogan boluň eziz tebigat bilen.

Al-asmanyň möwji bilen birigip,
Älem içre döreder ol dirilik,
Durşuň bilen halallyga öwrülip,
Dogan boluň eziz tebigat bilen.

Adamzat söýgüsi ýaşyl jähekdir,
Gögertmäge gije-gündiz sähetdir.
Her ýaşyl çöp gaş goýulan mähekdir,
Dogan boluň eziz tebigat bilen.

Güller ekiň ýüze düşsün şuglasy,
(Ne üýtgeşik gözelligiň gudraty),
Taparsyň özüňe güýji, gurbaty,
Dogan boluň eziz tebigat bilen.

Göwnüňi ýaz sakla, bolmarsyň teşne,
Ýigdelersiň säher müň owaz eşde,
Asman aşyk bolar Ýerdäki keşdä,
Dogan boluň eziz tebigat bilen.

(Aşyrbaý Hallyýew)